Kal je pokojan nono umor
jo śon jośće dite bil
jelnu vecer śumo śe iźvornil
priko śtola, naśri poda
kuda śe iśkerco
- pok je joci iśklopil
i iśpruźil śe kako bija
dotorkale śu udija
źene iź śuśidśtva
śkupile śe na merokul
kol noś u konobu
pok śu ga śvukle do gola
tumbali mu śtoru robu
i obukli bilu kośuju
śjarpetu
i veśtid
nako blid, iśkordon
kako svića ol vośka
leźol je u kantun
obukli śu ga, razumiś
kuda gre na miśu
kuda gre źa prośeśijun
źa Guśpu naśu, iś njin u kaśu
butali śu, krunicu i oficij
jedon kvodar ol śvetega Mikule
rukel kunca, i śliku ol Komiźe
jośće joglu ca śe karpri mriźe
oćole, beritu i śkatulu tobaka
ma pokojan nono, kako je legal
iź onega miśta vej ni śe maka
źa njin je ośtalo
proźnu miśto źa śtolen
jedon pjat manje, źjica i perun
niko cudno, tiho, dugo bul
oko śarca ca je śplela
tartajun
- jerbo nikal vej nikur ni śel
na nu katridu di je śidil un
i u kamaru ośtol je olmarun
veli, śtarinśki
kolura kako marun
u nje –
śumo corni biśovi kapot
śćop źa pikonte
rapove mudonte
nike śtore iśkidone gaće
dvi tri iźliźone kośuje
cokule
i jelna jaketa na maće
ma kal bi śe źaśkurilo
ono ca je bilo
tu śu śtropite i śtraje
źermoni ca bi śe śnilo
kal bi bilo
iś nonun da bi śpoli
jerbo, u tu kamaru doli
bil je i jedon voź ol late
di je pokojan nono śakrivol
dokumente, medicine, dintjeru
jedon librić i śtore letrate
i śal, tuko rej kako je
famuźo je oto bila śtvor
po lnevu kal biś gledol
vidil biś – śliku kako u kino:
kokuś di peruśo niki bekor
pok govori da je fino -
i źnol biś olma, po tiketi
da se toti lovuro
obo Vegeti
oti voź ol ruźine -
to ga je pokojan nono
bil opaha noni iź kuźine
i na bi śe bila iś njin korala do śmarti
da juj makne iź novega olmaruna
otu śporku śkatlu ol late
ośtavi tu! - źabeśtimol bi nono
- da ga niśi takla! -
a na bi ga śempre
na niku drugu miśto makla
pok bi śe otako
jelno na drugu iśpurgali
i vavik śe źboga tega voźa
tiketali
e - ma po noći tu bi śe drugacije parilo
kal biś śe źagledol, bilo bi ti śe pricinilo
kuda da je nikur gori iźvornil lopiźu
a źermona bi śe iś menon vavik kontreśtala
da na ne vidi niśta drugu, juśto - kukuviźu
ca von govorin
- gori, na olmarun
meju dvi valiźe
u kantun
źavukal je
pokojan nono
oti voź
- a ne rape
bile śu mu kako joci
pok jopet, onako otucen
imol je prefin gobu
juśta
i kjun
pok joś, pinku śvitla
kal bi palo na ti voź
ol ośoja
laśćil bi mu śe
i obroź
noko bi źaśpola nona
vej bi pocela źermona:
- je ti cujeś di klapuce?
- ono ga, ono ga...
place i jauce
ala źermona
kojo śi ti mona
nonka place, nonka jauce
ol ne cujeś da no vitar
meju śkure huce
- jo bi je tiśi
- a more bit da śu i miśi? -
opet bi ona fjabu voltala
pok bi niśto śoma iś śobon
gunjelala
i cavarjala
po śvu nuć
ne śtraśi śe mortvih
nego źivih -
nona bi śe priko śna jovila
ma bi źa caś jopetac
u śon utonila
pena na te beśide
źermona bi śe prenula
i mortve i źive na bi iźmiśala
pok bi śe joś veće śprenula
ol ciśtega mira
śkocila bi kako mona
i śkricola kako iśempijona:
- ono ga! ono ga!
śal će noś śvih butat u proh
pok bi upirola parśton
u olmarun – gori na vorh
i śva bi śe koćeta bila treśla
koko ju je bilo śtroh
ma źeno boźjo
umiri śe
ono ca cujeś
tu je śumo doź
no ca vidiś
- gori
niti je karkoś
niti je cijadin
niti je obroź
śal - je
da śu nutra źubi
ma tu ni drugu
nego - voź
kal bi jo iśpomenil dintjeru
ol śtroha na bi śe bila
popiśala
i źaludu ti je bilo
iś njun raśprovjat śe
odaśvuder nju je niśto
ćapovalo, śćipalo, śkakjalo
poteźalo i śtraśilo
je klapucalo niźa śkale
jeśu śkripale grede
jeśu tukle ure
je śe cul leruj kako kuri
jeśu śe lohale śkure
je śe kultrina makla
je ju nona iś nogun dotakla
je źaźviźjol śpalmej ol bure
je śe na śtrodu niśto pritumbalo
kol nje śve je tu
kmicalo i mjaukalo
kukulo, plakolo i jaukalo
hvaśćolo, driśćalo, triśkalo
śuśkolo i buśkolo
oli śe karśilo
pok - dok bi śe śve tu dośpilo
vej bi śe bilo i raśvanilo
vej bi śe źora źarudila
a na bi śe jośće bila
śtiśkala pol lancun
i śva bi u śtrohu
predola
i gledola
gori
u olmarun
i nikako juj niśi moga
dokoźat, brate
da tu ni pokojan nono
nego śumo
- voź ol late
Vinko Kalinić
Iz zbirke:
"Oltor nasri mora"
0 comments:
Objavi komentar