To je iśto covik
kako i mi
śumo ca ga nikal
doma ni
cin źora ośvane
un śe vej uśtane
cin otvori joci
iź pośteje śkoci
obuce gaće
i pośtole natakne
pok aźvelto
iź kuće omakne
priko lneva
śve kantune obojde
i di śe co dogojo
śvuder śe nojde
prefin u śvaku
un poviri śtrodu
intendi śe u śvaku
fjabu i monodu
kuda vitar da ga goni
nikal nimo mira
ma nojdraźe ol śvega
- tu je njemu! -
priko rive dvo tri jira
un źno śve
ca śe provje po paiźu
i ku je iś kin
śetol po korniźu
ku je ujol, a ku ni
di je ku butol mriźe
i ca śe kol koga doma
kuho u lopiźe
di je ku bil, ca je ku cinil
i ku je co obuka
prefin i tu
je śe ku iś kin potuka
ni tega ca un ne zno
ca śe provje i govori
- kurjuź je cudo
i nikal śe ne umori
a pena kal śe źaśkuri
penśo śumo obo temu
ca śe dogojo iźa śkuri
pok arjave – tu provju
ne śantoće i petegule! -
po noći da śe penje
na polkiće i pergule
do urih
propju kaśnih
da viri
iźa laśtrih
je tu tako, oli ni
jo von ne bi źnol reć
jośće, jerbo un paleto
i kal jo iden leć
śvitu muj
ca von govorin
ol ranega jutra
oti bi covik
paletol do śutra
tuko rej kako je
biśtro i ciśto
paletor – tu je
cijadin
ca ga ne darźi
miśto
Vinko Kalinić
Iz zbirke:
"Oltor nasri mora"
0 comments:
Objavi komentar