Onjel iź Paname



Kal śe pokojan Cvoncika kortejol
ni źnol koku je velu jubov
Gośpodin źa Komiźu ukoźol

kal je velin moren
pokojan Cvoncika navigol
po tujemu pajiźu kal je paletol
i śvoju śriću iśkol
ni źnol koki je blagośluv
nikur Veli, ol gori
no nje tumbol

iź dalekega śvita
kal śe pokojan Cvoncika vroćol
ni mogal lipji ubrat cvit
i śvume miśtu darovat
boji dor

ni śnilo mu śe ni
kal je iźabrol śvoju lipoticu
da će u Komiźu donit
źivu śveticu

da će oltori bit puni cvićo
beź njenega glośa da neće bit
ni śproguda, ni karśta
ni jelnega śveca
ni miśe
ol nedije



ol kal śon molu dite bil
kal bi me pokojan nono
u crikvu vodil
kal śon miśe olpivol
lipje ol śvega
pametin oti gloś
onu meku - ś

cujen ga kako źvoni
kako oldoje
i kako śe dviźe
viśoko

parvu bi śe organ jovil
źagunjelo bi niśto
ca nikur ne more raźumit
ku tu ni doźivil
źagarmil bi
kuda da śe probudil
śom Gośpodin
pok bi onda
iś njin
oti gloś
źalampol
kako onjel
da kanto


 
kako śal mi je
iśprid ociju -
niź kandele
prolila bi śe
ota śvitluśt
kuda da je nikur gori
iźvornil butiju
velu niku butiju
kuda da je nikur
prolil
- a na bi kantala
oko śarca
uvila bi śe miluśt
kuda mati
kal dite
povije

ol jedonput
śva bi śe crikva
kako źikva źibala
i coviku bi śe
na momente
pricinilo
iś onjelima
da śtoji
impijo
- bok uz bok



kako da śe
śva Komiźa
na nu bondu
iźbandala
pok śe
niź oblok
pritumbala
i Muśter
i Novo Crikva
i Guśpa Guśarica
prefin Śveti Bjoź
Guśpa ol Planice
i Śveti Rok
pok i śal
kal śon nareśa
kal po śvitu śemeton
i kal śon daleko ol Komiźe
ćapon śe digo
iz nebuha
di śom iś śobon
kako molu dite
kanton


 
dogodi śe -
śomo ol śebe
śarce źatrepeće

ol namo ninder
di onjeli śpidu
oldoje oti gloś

i organ źvoni

oto teta Elvira
kanto
i Boga moli
źa śvih noś

da niśon oto doźivil
ne bi nonka
ovu piśmu napiśol
- a da je iś tin otako
tu more pośvidocit
i śom otac biśkup
i don Śime
i don Ivo
i don Paulin
i brat mu
Niko Śamarina
i cili carkovni olbor

a i śvaki pośteni covik
koji je noko i jedon put
u komiśke crikve Boga molil
- śvaki ol njih rej će von
iśtu śtvor

da take źene
na śkoju
vej ni


Vinko Kalinić


Iz zbirke
"Oltor nasri mora"



Onjel iź Paname Onjel iź Paname Reviewed by Vinko Kalinić on 11:09:00 Rating: 5

Nema komentara:

Pokreće Blogger.